Ýurt daşyndaky Türkmenistanyň raýatlarynyň biometrik maglumatly pasportlarynyň möhletiniň uzaldylmagy bilen bagly

Hormatly raýatlar!

Häzirki wagtda Internet torunda (sosial mediýada) ýurt daşynda wagtlaýyn ýa-da hemişelik ýaşaýan Türkmenistanyň raýatlarynyň biometrik pasportlarynyň möhletleriniň geljek ýyllar üçin hem uzaltmalaryň dowam edýändigi barada galp we nädogry maglumatlaryň ýaýradylýandygyna ünsüňizi çekýäris.

Türkmenistanyň Prezidentiniň 2022-nji ýylyň 9-njy maýyndaky «Türkmenistanyň raýatynyň Türkmenistandan gitmek we Türkmenistana gelmek üçin pasportynyň hereket ediş möhletiniň uzaldylandygy barada bellikleri etmegiň Tertibi» hakyndaky Buýrugy esasynda, daşary ýurt döwletlerinde wagtlaýyn bolýan ýa-da hemişelik ýaşaýan Türkmenistanyň raýatlarynyň biometriki pasportynyň hereket ediş möhletiniň diňe 2024-nji ýylyň 31-nji dekabryna çenli uzaldylýandygy barada gaýtadan ýatladýarys!

Şeýle hem, ýokarda agzalanlardan ugur alyp, daşary ýurt döwletlerinde wagtlaýyn bolýan ýa-da hemişelik ýaşaýan Türkmenistanyň raýatlarynyň biometriki pasportynyň hereket ediş möhleti 2024-nji ýylyň 31-nji dekabrynda tamamlanýan ýagdaýynda, raýatlara biometrik maglumatly pasportlaryny Türkmenistanda täzelemekleriniň zerurdygyny mälim edýäris.

Daşary ýurt döwletlerinde wagtlaýyn bolýan ýa-da hemişelik ýaşaýan Türkmenistanyň raýatlarynyň biometrik pasportlary ýitirilen, ogurlanan, möhleti geçen ýa-da ulanyşa ýaramly bolmadyk halatynda (çip döwülen), şeýle-de daşary ýurtlarda Turkmenistanyň raýatlaryndan dünýä inen çagalara diňe öz döwletine dolanyp barmak maksady bilen «Türkmenistana dolanyp barmak üçin şahadatnamanyň» resmileşdirilýändigini habar berýäris.